Словенија воведува надзор на границите поради безбедносни закани

Словенечката влада одлучи од сабота да воведе надзор на границите со Хрватска, објави агенцијата СТА.

Како што објасни вчера министерот за внатрешни работи на Словенија, Боштјан Поклукар, станува збор за предлог за привремена мерка поради зголеменото ниво на процена на терористичка закана во земјите од Европската Унија. Деталите за одлуката ќе бидат објавени во текот на денот.

Италија ја извести Словенија дека првично ќе воведе гранични контроли за десет дена со можност за продолжување. Италијанскиот министер за внатрешни работи, Матео Пјантедоси, го информирал својот словенечки колега Боштјан Поклукар дека суштината на воведувањето на оваа привремена мерка е спречување на тероризмот и организираниот криминал. Двајцата министри се согласија дека западнобалканската рута, која внимателно ја следат словенечките и италијанските безбедносни служби, може да биде атрактивен коридор за потенцијална радикализација.