Договорот со „Бехтел и Енка“ ќе се разгледува на затворена седница и ќе присуствуваат само пратеници со безбедносен сертификат

Договорот за изградба на Коридорите 8 и 10д со американско-турскиот конзорциум „Бехтел и Енка“ во Собранието ќе се разгледува на затворена седница и ќе присуствуваат само пратеници кои имаат безбедносен сертификат.

Ова денеска го објави прес-службата на собранискиот спикер, Талат Џафери по завршувањето на редовната координација со координаторите на пратеничките групи и претставниците на политичките партии во Собранието.

-Една од точките на Дневниот ред беше и претставувањето на Договорот за изградба на Коридорот 8 и 10д пред пратениците во Собранието. Со оглед на тоа што Договорот е класифициран, односно само пратениците кои се носители на безбедносен сертификат имаат увид во неговата содржина, Договорот ќе се разгледува на седница на Комисија која ќе биде затворена за јавноста и на неа ќе присуствуваат само пратениците кои имаат безбедносни сертификати, се вели во дописот од прес-службата на Џафери.

Како што велат оттаму, опозицијата ќе треба да предложи надлежно тело за разгледување на Договорот.

-Ставот на присутните на координацијата е дека, со оглед на тоа што иницијативата е на опозицијата, а опозицијата не присуствува на координација; опозицијата да предложи надлежно тело за разгледување на Договорот до претседателот и да определи датум кога ќе се разгледа Договорот. Веднаш по отворањето на комисиската седница, пратениците ќе се изјаснат за затворање на седницата за јавноста, велат од Собрание.

Претходно пратеникот од ВМРО-ДПМНЕ, Антонио Милошоски на Фејсбук обвини дека владејачкото мнозинство ќе бара изговори за пратениците да не го добијат Договорот.

-Во Собранието денеска владеачкото мнозинство ќе се обиде на координација да наоѓа изговори како пратениците да не го добијат коруптивниот Договор за прескапите автопати и на која Комисија би требало да се разгледува, вели Милошоски.

Пратеникот потсетува дека матична Комисија во Собранието каде треба да се разгледува Договорот е само Комисијата за транпорт, врски и екологија.

-Иако за втората тема нема дилеми, Комисијата за транспорт е надлежното работно тело кое разгледува материјали за изградба на инвестициони објекти во транспортот и патниот сообраќај. Секоја друга импровизација ќе биде само уште еден обид овој Договор да се држи во тајност, напиша Милошоски.