Српски метеоролог предупредува: Следната недела имаме „лудо“ време - се враќа снегот

Топло до сабота, а од недела заладување, кое ќе се интензивира вечерта кон понеделник, со посилно влошување на времето со засилен ветер, дожд и грмежи,  најави Марко Чубрило, српски метеоролог аматер чии прогнози ги следи целиот регион.

Според него, снегот се враќа на подрачјата над 800 метри надморска височина, додека во низините постои опасност од доцен мраз. Околу 30 март ќе биде потопло, но по 2 април можно е ново заладување со врнежи, се вели во новата временска прогноза на Марко Чубрило.

Од сабота, според неговата прогноза, се очекува влошување на времето со дожд и грмежи, претежно во западниот и северниот дел од регионот. Во тие предели ќе залади и максимумот ќе се движи околу +13 Целзиусови степени, додека во останатиот дел од регионот ќе се движи од +15 до +19 Целзиусови степени. За кратко ќе дува засилен северозападен ветер особено во северниот дел од регионот.

Во недела во поголемиот дел од денот ќе има преодно подобрување на времето, но попладне на запад, југозапад и северозапад од регионот ќе биде пооблачно со врнежи од дожд и грмежи. Ова влошување ќе се должи на движењето на силен студен фронт над Алпите и секундарна циклогенеза над Јадранот. Тој циклон ќе се движи североисточно преку Јадранот од понеделник навечер до среда.

Во неговиот студен сектор ќе навлезе големо количество релативно студен воздух, а со многу силен и бурен северозападен ветер ќе следи нагло заладување. Бидејќи антициклонот истовремено ќе зајакне над Централна Европа, големата разлика во воздушниот притисок помеѓу овие два барични системи може да предизвика многу ветровито време во понеделник и вторник.

Во понеделник влошување на времето ќе има во целиот регион со врнежи од дожд, на места грмежи и силен студ, така што на места над 800 метри надморска висина врнежите брзо ќе преминат во снег, а до среда претпладне ќе има наноси од снег во оние подрачја со силен северозападен ветер и формирање на снежна покривка со висина од 2 см на подрачја кои се на околу 800 метри надморска височина, додека на повисоките места би паднале околу 15 см снег.

Во низините по дождот во понеделник, вторник ќе донесе врнежи од дожд, град и лапавица, додека среда би била претежно суво, но релативно студено.

Максималните температури во понеделник ќе се движат од +6 во северозападниот и северниот дел од регионот до околу +15 на крајниот југоисток каде засилено заладување ќе започне во понеделник попладне. Во вторник и среда максималните температури главно ќе бидат од +4 до +10 Целзиусови степени, што е значително под просекот за овој дел од годината. Ноќните минимуми исто така ќе бидат многу ниски околу 29 март и постои голема опасност од појава на доцни мразови, особено во областите над 700 метри надморска висина.

Кон крајот на следната недела би можело да следи минливо затоплување, но веќе околу 2 април има сигнал за можно дополнително влошување на времето со врнежи, силен ветер и силен студ, почнувајќи од недела навечер, напиша Чубрило.