Бакрачески: „Сахарјан Македонија“ ќе ги прифати сите забелешки од македонските власти

Никола Бакрачески, градоначалникот на Охрид, изрази задоволство од подготвеноста на компанијата „Аткинс“, како главен проектанат на луксузниот хотелски комплекс „Сахарјан Македонија“, да се прифатат сите забелешки и критериуми што од нив ќе ги побараат македонските власти.

- По тој аспект можам само да упатам смирувачки тон до сите загрижени граѓани на Охрид и оние скептици кои сметаат дека што било ќе се гради спротивно стандардите. Во никој случај, ниту  државните институции тоа ќе го дозовлат, ниту јас како градоначалник ќе се согласам со изградба на нешто што по која било основа ќе отстапува од строгите законски и еколошки норми, рече Бакрачески.

- Она што можам да го кажам е дека пред две седмици во Министерството за транспорт и врски се одржа средба во широк состав, со присутни претставници на сите релевантни институции засегнати со изградбата на комплексот, од инвеститорот, преку проектантското студио „Аткинс“, до министерствата за транспорт и врски, за култура, за заштита на животната средина, на Хидробиолошкиот завод од Охрид и Националниот парк „Галичица“. Она што можам да го потврдам е дека кај инвеститорот и кај надлежните институции постои подготвеност да се реализира таа инвестиција, додаде градоначалникот на Охрид.