Ќе има ли избори на 24 април?

Имплементирање на обврските од договорот од Пржино е главна тема на денешните средби помеѓу европратениците Вајлг, Ховит и Кукан со лидерите и претставниците на најголемите политички партии.

Преку писмено соопштение од ВМРО-ДПМНЕ информираа дека пред европратениците било потенцирано дека од нивна страна се исполнети сите превземени обврски. На меѓународните претставници им биле пренесени и очекувањата дека Договорот од Пржино ќе биде целосно реализиран, вклучувајќи го и клучниот услов, изборите на 24 април.

Одржувањето на изборите во предвидениот датум ќе значи и целосно заокружување на Договорот и излез од кризата. Ваквиот исход го очекуваат и потписниците на договорот и меѓународните претставници, а пред се граѓаните на Република Македонија. Секој обид да се изигра овој услов го доведува во прашање целокупниот договор и се што е досега постигнато, стои во соопштението на ВМРО-ДПМНЕ.

Со сличен став и опозициската СДСМ. Оттаму информираат дека лидерот Заев пред европратениците го потенцирал своите ставови околу моменталната политичка состојба во земјава.

„На средбата се разговараше за спроведување на Договорот од Пржино и потребата од негова суштинска имплементација. Претседателот Зоран Заев рече дека Договорот од Пржино е единствена можност за излез на Македонија од политичката криза и дека само со негово целосно спроведување може да создаде услови за одржување на фер и демократски избори“ се вели во соопштението на партијата.

Средбата со лидерите на ДУИ и ДПА, Али Ахмети и Мендух Тачи се одржаа во канцеларијата на Европската комисија во Скопје. Нивниот став е дека одложување на превземените обврски би значело продлабочување на кризата.

Според европратеникот Иво Вајгл пак, заклучоците од сите средби ќе бидат соопштени на утрешната прес-конференција.

Дводневаната посета европратениците  ќе ја искористат и за средби со специјалната јавна обвинителка Катица Јанева и членови на Државната изборна комисија. Нивната прес-конференција е закажана за утре попладне.

Конечниот одговор на прашањето дали ќе има избори на 24 април се очекува по посетата на еврокомесарот Јоханес Хан на Македонија