Неоснованите напади на СДСМ врз КУРИР резултираа со упад во просториите на нивната редакција

По низата напади и закани кои изминатиов период беа упатени врз новинари на КУРИР, просториите на нивната редакција во текот на минатата ноќ беа цел на грабеж, односно провала од засега непознати лица кои насилно упаднаа во редакцијата на КУРИР. Ова не е првпат нивните простори да бидат мета на напад.

Секоjдневните неосновани атаци врз КУРИР како медиум од страна на разни опозициски структури, но и директно од најголемата опозициска партија СДСМ кулминираа со нов удар врз овој медиум.

Во текот на минатата ноќ со разбивање на една од балконските врати во просториите каде е сместена нивната редакција извршена е кражба на лаптоп компјутери на вработени во КУРИР.

Ваквиот упад во просториите на КУРИР следува по низата навреди и монструозни закани по живот на наши вработени кои кулминираа во месец ноември,  кога член на СДСМ испрати смртни закани до вработена во овој медиум, каде им се закануваше по живот и на сите вработени.

Дополнително, КУРИР секојдневно е мета на неосновани напади од страна на најголемиот опозициски политички субјект СДСМ, кој секојдневно со разни неосновани соопштенија врши директен напад и притисок врз медиумот. Секое соопштение од штабот на СДСМ насочено против овој медиум е јасен напад врз слободата на говорот и работењето на медиумите.  Секое соопштение од штабот на СДСМ се толкува како директен притисок и закана по медиумот и новинарите кои работат во него.

Најновиот упад во просториите, КУРИР уредно го пријави во Министерството за внатрешни работи, каде направен е записник и очекуваме надлежните во најбрз можен рок да ги откријат сторителите, за што и јавно го повикуваме техничкиот министер за внатрешни работи Оливер Спасовски. Редакцијата на Курир особено стана мета на напади и закани по секојдневните сопштенија од страна на СДСМ во кои без никаков основ се атакуваше врз овој медиум.

Како и со сите случаи претходно во кои КУРИР беше мета на напад, така и овој пат за упадот во нивните простории се известени надлежните институции, странските амбасади и сите новинарски здруженија. КУРИР работел и ќе работи крајно професионално и во интерес на своите посетители и повторно порачуваме дека било какви напади врз овој медиум нема да ги заплашат.