Тодоров се сретна со струмичките доктори кои се обучуваа во странство

Во рамки на третиот ден од петдневната работна посета на Струмичката општа болница, министерот за здравство Никола Тодоров денеска се сретна со докторите од таа јавна здравствена установа кои беа на едукација во Бугарија, Србија и Турција.

- Денешниот состанок со групата лекари од Струмица кои беа испратени на едукација во странство беше навистина плоден. Задоволен сум што тие ги прошириле своите знаења, но и стекнале нови пријателства кои ќе им помогнат во консултациите и примената на новите здравствени практики, рече Тодоров.

Министерот истакна дека за време на посетата на струмичката болница биле детектирани одредени организациски и просторни проблеми и додаде дека за нив веќе се барат решенија.

- Не можам да кажам дека е се лошо или дека е се идеално. Нормално имаше забелешки во делот на педијатријата, се најдоа решенија околу терапијата што се применува. Во однос на малиот број педијатри, решивме во наредниот период од една година во ова болница трипати неделно да доаѓа педијатор од Скопје, кој воедно ќе врши обука, но и преглед на пациентите. Исто така ќе испратиме медицински сестри на обука во Скопје со цел подобрување на негата кон пациентите, нагласи министерот Тодоров.

Со цел разрешување на проблемите во Одделението на патологија, Тодоров истакна дека ќе биде испратен еден доктор на специјализација во Скопје, а во периодот на неговата специјализација постепено ќе се оформи одделение за патологија во Општата болница во Струмица. Најави дека во септември ќе им се даде уште еднаш можност на лекарите од Струмица да заминат на специјализација во Скопје.

Министерот Тодоров попладнево во административната зграда во рамки на Општата болница во Струмица ќе има приемен ден и сите заинтересирани граѓани од тој регион ќе имаат можност со него да разговараат.