Косово наскоро ќе има своја војска

Косовскиот министер за одбрана во заминување Агим Чеку изјави дека Косово наскоро ќе има своја војска и оти на првата седница на косовскиот Парламент, по неговото конституирање ќе биде донесена одлука за трансформација на безбедносните сили во вооружени сили на Косово.

- Формализацијата на косовските безбедносни сили во вооружени сили на Косово доцни поради тоа што се уште не е конституирано Собранието. Но верувам дека една од првите одлуки на Парламентот ќе биде формалното прогласување на вооружените сили на Косово, рече Чеку во интервју за весникот „Епока е ре“.

Тој додаде дека цврсто верува во реализацијата на тој проект, бидејќи „станува збор за национален проект, кој е од големо значење за земјата и за граѓаните“.

Тој проект, според него, има мошне широка поддршка и моќни меѓународни сојузници.

На прашањето дали за оваа транформација може да се смета на гласовите на опозицијата, Чеку изјави дека за неа се залагаат сите парламентарни политички партии и оти не очекува никакви проблеми или приговори. 

На Косово денеска се одбележува Денот на Косовските безбедносни сили.