Колбасите и меленото месо безбедни - се утврдува изворот на листерија

Колбасите и меленото месо не се причина за појава на бакетријата листерија кај луѓето. Изворот допрва ќе се утврдува. Ова денеска го соопшти Агенцијата за храна и ветеринарство.

Типот листерија пронајдена во храната воопшто не соодветствува со онаа кај заболените лица, ниту количински е застапена над дозволеното ниво пропишано со Правилникот и европските стандарди. Листерија има, но во минимални количини, под 10 колонии на грам што е далеку под дозволеното ниво од 100 колонии на грам во рамки на рокот на траење на производот, рече директорот на АХВ Дејан Рунтевски на прес-конференција.

При анализите направени на Ветеринарниот факултет, испитани беа 610 од вкупно 750 мостри од месната и млечната индустрија. Притоа, 23 биле позитивни на листерија. На 16 е направена генотипизација која не покажала ниту едно совпаѓање со листеријата кај заболените лица, додека на осум е извршено квантитавно испитување - утврдување на количинската застапеност.

Во Македонија изминатиов месец од листерија заболеа вкупно осум лица од кои четири починаа.