Индија воведе построги мерки против загадувањето на воздухот

Индиската влада воведе нови построги мерки против влошување на загадувањето на воздухот во Њу Делхи, кој според проценките на швајцарската организација „IQAir“ е најзагаден град во светот, со индекс на загаденост од 424.

Тие мерки вклучуваат забрана за неопходни градежни работи и апел до граѓаните да избегнуваат палење јаглен за греење, објави „Ројтерс“.

Новите мерки, кои стапуваат на сила од утре, опфаќаат прскање вода со средства за спречување прашина на патиштата, како и механичко чистење на улиците за да се намали количината на прашина.

Исто така, сите основни училишта во главниот град ќе преминат на онлајн настава.

Министерот за образование на Њу Делхи, Атиши, нареди затворање на училиштата, додека владата апелираше до граѓаните повеќе да го користат јавниот превоз и да избегнуваат користење јаглен и дрва за греење. Надлежните не прецизираа до кога ќе важат овие мерки.

Квалитетот на воздухот во северна Индија драстично се влоши во последните денови, додека смогот, мешавина од чад и магла, покри многу знаменитости, вклучувајќи го и Таџ Махал, кој се наоѓа на 220 километри од Њу Делхи, како и Златниот храм.

Околу 38 отсто од загадувањето во Њу Делхи оваа година е предизвикано од согорувањето на остатоците од културите, кога растителните остатоци се палат по жетвата.

Докторите известуваат за зголемување на бројот на заболени, особено кај децата, заболени од алергии, кашлица и настинка, а зголемен е и бројот на заболени од астма.

Зголемен е и бројот на теренски пожари во северна Индија. Речиси 2.300 пожари биле пријавени само во средата, наспроти 1.200 во понеделникот.