Град Скопје: Секретарот Велковски беше разрешен заедно со Перински во петокот

Во петокот разрешен е од функција Секретарот на град Скопје Ѓоко Велковски, информираат од Град Скопје во соопштение испратено до медиумите, веднаш откако секретарот на град Скопје, Велковски на социјалната мрежа Фејсбук, напиша дека е разочаран од слабиот потенцијал на градоначалничката Данела Арсовска.

„Од функцијата Секретар на град Скопје, во петокот разрешен Ѓоко Велковски, а причина за разрешувањето е неговото влијание во спорна тендерска постапка за изведба на пречистителна станица во вредност од 136 милиони евра, средства кои се обезбедени од ЕБОР и ЕИБ.

Велковски, во петокот е разрешен заедно со в.д директорот на ЈП Водовод и Канализација-Скопје Златко Перински поради обиди за влијание кои се сметаат за тенденција која ги потврдува основаните сомнежи на Град Скопје за самоволие и несоодветно постапување во постапката за избор на изведувач во милионски тендер.

Градот Скопје нема да дозволи расипничко трошење на парите на скопјани, ниту финансирање на лични и теснопартиски интереси. Скопје е град на сите скопјани“, се наведува во соопштението на Град Скопје испратено до медиумите.