Финансиска полиција: Кривична пријава за тројца од Министерството за земјоделство

Финансиска полиција со кривични пријави против три лица во Министерството за земјоделство.

Првопријавениот, вработен во Министерството, согласно Решение, несовесно постапувал при вршење на своите овластувања, на начин што во текот на 2021 и 2022 година не изготвил записник за одземање на владението на правниот субјект ДЗС Илинден АД Скопје, иако уредно му била доставена Изјава за раскинување на договорот за закуп на акционерското друштво.

Второпријавената, вработена во Министерството, Изјавата за раскинување на договорот за закуп на правниот субјект ДЗС Илинден АД Скопје не ја доставила до надлежните служби на МЗШВ-Гази Баба за истата да биде евидентирана во ФАРМ системот и правниот субјект ДЗС Илинден АД Скопје да биде избришан од Единствениот регистар на земјоделски стопанства.

Третопријавениот, функционер во Министерството за земјоделство, во период од јануари 2022 до ноември 2023 година ги повредил законските прописи за совесно постапување при вршењето на своите овластувања со пропуштање на должен надзор над комисијата за одземање на владение врз основа на престанок на склучени договори за закуп, формирана од страна на министерот.