Едно од опожарените возила во Куманово е на јавниот обвинител Џелал Бајрами

Едно од возилата што синоќа беа опожарени во Куманово е на заменик-јавниот обвинител Џелал Бајрами, пренесе „360 степени“.

„Возилото, кое е приватно, беше паркирано пред објектот каде што живеам. Беше опожарено меѓу 3 и 3:15 часот утринава. Друга штета не е предизвикана“, изјавил Бајрами за 360 степени.

Бајрами не се сомнева во никого и остава органите да го истражат случајот

Тој потврдил дека дежурен јавен обвинител веќе излегол на местото на настанот и од страна на органите се подигнати доказни материјали.

Претходно од Обвинителство информираа дека еден од опожарените автомобили е на јавен обвинител и дека дежурен јавен обвинител од Основното јавно обвинителство во Куманово извршил увид на локациите каде што се опожарени два автомобили и една деловна просторија, фотокопирница.

Оттаму велат дека се преземени сите дејствија и се испитуваат причините и евентуалните мотиви за опожарувањето на автомобилите и дуќанот.

Друго возило, како што дознава „360 степени“ е на близок роднина на пратеник и функционер на Демократската унија за интеграција (ДУИ).

Ноќеска во Куманово опожарени се три автомобили, еден деловен објект – фотокопирница и фасада од куќа, информираа од Секторот за внатрешни работи (СВР) Куманово.

Две од возилата што гореле и во чие гаснење интервенирале пожарникарите, биле на улицата „Трст“, а третото на улицата „Никола Вапцаров“. На истата улица била и опожарена фасада од куќа.

Фотокопирницата, која горела, пак, е лоцирана на улицата „11 Октомври“.

Според информациите за интервенциите на пожарникарите, речиси сите биле во исто време.