Шутаров: ВМРО-ДПМНЕ да им се извини на граѓаните, за тендери и провизии стојат проектите во Скопје

Гордан Шутаров, советник во Советот на Град Скопје, кажа дека ВМРО-ДПМНЕ треба да им се извини на граѓаните за лагите во претходните 11 месеци.

„Шпицниот градоначалник Мицкоски, градоначалничката на Скопје Данела Арсовска и локалната власт во Град Скопје предводена од ВМРО-ДПМНЕ да излезат и да им се извинат на граѓаните за сé што ги излажаа пред 11 месеци и за сета негрижа што им ја пружија во изминатите 11 месеци. Речиси цела година Скопје тапка во место поради лични и бизнис интереси на шпицниот градоначалник и ВМРО-ДПМНЕ. Целата јавност е сведок дека приоритет им биле тендерите и личните интереси, а решавањето на проблемите на граѓаните на последно место. Наместо за развој и унапредување на Град Скопје тие правеле планови за тендери, провизии, влијанија. На крајот кога очигледно не можеле да се договорот јавно меѓусебе се скараа“, вели Шутаров.

Последица на нивните кавги се откажани, стопирани проекти и нереализирани ветувања во Град Скопје, кажа советникот на СДСМ.

„Заглавена е пречистителната станица за која во ВМРО-ДПМНЕ се расправаат околу провизиите за тендерот во вредност од 136 милиони евра. Брзиот автобуски транспорт во Скопје не се реализира, иако за него има одобрени средства, а нема ни нови автобуси, за кои Христијан Мицкоски како шпицен градоначалник јавно се пофали дека ги договарал. Недоправена стои Универзалната сала, иако за реконструкцијата има одобрено средства, нема напредок ниту кај клучката во Момин Поток, не се гради мостот на улица Љубљанска. Не е пуштен мостот што ги поврзува Аеродром и Керамидница, ниту улицата Есенинова, што ги поврзува Аеродром и Кисела Вода, кои треба да го смалат сообраќајниот метеж во тој дел од градот и да им заштедат време и нерви на граѓаните. Парното во Скопје мораше Владата да го преземе за да не смрзнат скопјани. Сега ја знаеме причината зошто – локалната власт на ВМРО-ДПМНЕ наместо да се занимава со решавање на проблемите на граѓаните, цела година се занимава со тендери и лични интереси. Најмалку што можат да направат е да им се извинат на граѓаните и да се фатат за работа, за која граѓаните им ја дадоа својата доверба“, порача тој.