Се огласи Русија за немирите во Косово: Гледаме прилично воспоставен необјективен однос кон Србите

Кремљ објави дека внимателно ја следи тензичната и политички опасна ситуација во Косово, каде што етничките Срби поставија барикади на патиштата, што предизвика оружен конфликт со косовската полиција и четири лица беа убиени.

„Гледаме многу напната и потенцијално опасна ситуација на Косово и внимателно ја следиме. Гледаме прилично воспоставен необјективен однос кон Србите. Ова е традиционално неизбалансирана линија“, изјави портпаролот Дмитриј Песков.

Група вооружени локални Срби поставија патна барикада во близина на селото Бањска во неделата рано наутро, а потоа убија косовски полицаец од групата, која дошла да интервенира. Во продолжението на конфликтот загинаа тројца Срби од Косово, кои во меѓувреме се забарикадираа во манастир.

Иако конфликтот почна со поставување барикади, српскиот претседател Александар Вучиќ ги обвини КФОР и косовскиот премиер Аљбин Курти за насилството.

„Барикадите требаше да ги отстрани КФОР бидејќи тие се задолжени за слободата на движење, а не косовската полиција“, рече Вучиќ.

Истовремено, тој ја отфрли одговорноста на официјален Белград за самоорганизирање на Србите посочувајќи дека „тие се побунија затоа што повеќе не сакаат да го трпат теророт на Курти“. Тој ја обвини и меѓународната заедница дека му дала отворени раце на Курти и ја овозможила акцијата на косовската полиција.