Хаг: Забрана за посети на Тачи и на припадниците на ОВК

Поранешните политички и воени лидери на ОВК кои се приведени од Специјалниот суд во Хаг, можат да комуницираат со членовите на своите семејства само преку видео врска, а никој не може физички да ги посети.

Оваа информација ја потврди Специјалниот суд во Хаг.

– Посетите во притворската единица во моментот не се можни поради ограничувачките мерки за коронавирусот. Со цел да се олесни редовниот контакт со семејството, овозможени се средби преку видео врски, изјави портпаролката на Специјалниот суд, Ангела Грип, пренесена од „Косово онлајн”.

Седум поранешни политички и воени лидери на ОВК се обвинети за серија злосторства, од заплашување на сведоци, до убиства и лошо постапување. На списокот со обвинети се Хашим Тачи, Кадри Весели, Јакуп Красниќи, Реџеп Селими и Саљих Мустафа.