Доларот зајакна трета недела по ред

На светските берзи вредноста на доларот во однос на шесте најважни светски валути порасна минатата недела, трет пат по ред, бидејќи се појасно е дека американската централна банка агресивно ќе ја заостри монетарната политика за да ја спречи високата инфлација.

Индексот на доларот, кој го покажува движењето на вредноста на американската во однос на другите шест најважни светски валути, минатата недела зајакна за 0,65 отсто, на 101,16 поени, ново највисоко ниво во повеќе од две години.

Истовремено, курсот на доларот во однос на јенот скокна за 1,6 отсто, на 128,50 јени, а во еден момент достигна и 129,43 јени, највисоко ниво во последните 20 години.

Американската валута зајакна и во однос на еврото, при што еврото падна за 0,2 отсто на 1,0790 долари, што е блиску до најниското ниво во последните две години.

По две недели раст, дополнителен стимул на доларот минатата недела даде претседателот на американската централна банка Џером Пауел, кој рече дека на состанокот на ФЕД на почетокот на мај ќе се разгледа зголемувањето на клучните каматни стапки за 0,50 процентни поени.

Бидејќи инфлацијата во САД е на највисоко ниво во повеќе од 40 години, соодветно е работите да се движат малку побрзо, рече Пауел во дискусијата за глобалната економија на состанокот на Меѓународниот монетарен фонд (ММФ).

На мартовската седница, ФЕД ги зголеми каматните стапки за прв пат од 2018 година, за 0,25 процентни поени, а веројатно ќе ги зголеми за дополнителни 0,50 процентни поени во мај.

По најновите коментари на Пауел и другите челници на ФЕД, станува се појасно дека монетарната политика ќе се затегне агресивно.

Од друга страна, јапонската централна банка извесно време ќе води блага монетарна политика за да го поддржи економското закрепнување и покрај зголемените инфлациски притисоци.

Како резултат на тоа, курсот на јенот во однос на доларот падна на најниско ниво во последните 20 години.

Американската валута исто така зајакнува во однос на европската валута, но не толку брзо како во однос на јенот.

Еврото е поддржано од растечките очекувања дека Европската централна банка (ЕЦБ) ќе мора да ја заостри монетарната политика порано од очекуваното, бидејќи инфлаторните притисоци во еврозоната продолжуваат да растат.

Неодамна од седницата на ЕЦБ беше објавено дека во третиот квартал ќе се укинат стимулативните програми и дека дури тогаш ќе се зголемат каматите.

Така, минатата недела продолжи да расте вредноста на доларот, кој од почетокот на годината зајакна за 5,7 отсто во однос на другите шест важни светски валути.